Banka ProCredit Kosovë dhe Banka Evropiane për Rindërtim dhe Zhvillim nënshkruajnë marrëveshje bashkëpunimi
Banka Evropiane për Rindërtim dhe Zhvillim (BERZH) mundëson një linjë të re kreditimi për Bankën ProCredit Kosovë. Kjo linjë u jep ndërmarrjeve të vogla dhe të mesme (NVM) në Kosovë mundësi për rigjallërimin e bizneseve të tyre pas ndërprerjeve të shkaktuara nga pandemia Covid-19.
Banka ProCredit Kosovë do ta shfrytëzojë shumën 20 milionë euro për t’u dhënë kredi bizneseve të vogla dhe të mesme që të bëjë të mundur realizimin e investimeve në teknologji të gjelbra me performancë më të mirë, si dhe përmirësimin e standardeve dhe proceseve të tyre të punës. Këto investime nga NMV-të kosovare duhet të jenë në pajtueshmëri me standardet e Bashkimit Evropian dhe ato ndërkombëtare, për të arritur konkurrueshmëri më të lartë në tregun vendor dhe të jashtëm.
NVM-të do të përfitojnë edhe stimuj në formë granti me vlerë deri në 15 për qind të shumës së kredisë, që i bën investimet e tyre më të përballueshme. Grantet do të financohen nga Norvegjia, Luksemburgu dhe Shtetet e Bashkuara të Amerikës, pritet të marrin pjesë edhe donatorë të tjerë.
Në kuadër të Programit të vet për Lehtësimin e Tregtisë (PLT) BERZH-i i ofron Bankës Procredit Kosovë edhe deri në 5 milionë euro të tjera për t’i mbështetur NVM-të lokale të rrisin tregtinë e jashtme dhe integrimin në tregjet ndërkombëtare. Ky instrument do të ndihmojë për adresimin e rritjes së kërkesës për financim të tregtisë që ka ardhur si rezultat i ndërprerjeve të zinxhirit global të furnizimit, të shkaktuara nga pandemia Covid-19.
Presidentja e BERZH-it, Odile Renaud-Basso, e cila ishte për vizitë zyrtare në Kosovë dhe nënshkroi marrëveshjen me Bankën ProCredit, tha: “Jemi shumë të kënaqur që sërish, me Bankën ProCredit Kosovë, mund të ofrojmë financime të reja për NVM-të lokale. Linja e kreditimit do të lehtësojë qasjen në financim të strukturuar mirë për bizneset e vogla, duke u ndihmuar të rimëkëmben nga efektet negative të pandemisë Covid-19 dhe të investojnë në teknologji moderne për t’u bërë më të qëndrueshëm”.
Eriola Bibolli, Menaxhere e Përgjithshme e Bankës ProCredit Kosovë, tha: “Nënshkrimi i kontratës së sotme për ofrimin e financimit të ri për NVM-të lokale pasqyron përkushtimin e përbashkët dhe parimet e njëjta të të dy institucioneve në lidhje me promovimin dhe mbështetjen e investimeve për rritje të qëndrueshme, duke e rritur konkurrueshmërinë e klientëve tanë në tregjet lokale dhe ndërkombëtare”.
Pandemia Covid-19 e ka goditur rëndë sektorin e NVM-ve në Kosovë, duke penguar rritjen dhe planet për investime. Duke qenë ndërmarrje të vogla dhe duke patur qasje të kufizuar në financim, NVM-të ishin më pak të afta të përballojnë me fleksibilitet kostot shtesë të shkaktuara gjatë pandemisë, ndryshimet në proceset e punës, fuqinë punëtore të pashfrytëzuar etj. Kjo i shtyu NVM-të që prioritetet e tyre në investime për rritje të qëndrueshme t’i zhvendosnin drejt mbijetesës dhe mbrojtjes.
Linja e kreditimit është pjesë e Programit të ri të BERZH-it për Rigjallërim të NVM-ve që mbështet rimëkëmbjen e kompanive të vogla nga ngadalësimi që u shkaktoi pandemia. Banka ProCredit Kosovë është banka e parë në vend që i bashkohet këtij programi, i cili do t’i inkurajojë NVM-të të shkojnë përtej metodave të zakonshme të biznesit dhe të investojnë në teknologji moderne dhe të qëndrueshme. Rreth 70 përqind e financimit të programit do të alokohet për investime në kursim të energjisë dhe teknologji të gjelbra, ndërsa pjesa e mbetur do të mbështesë investime për automatizim, rritje të produktivitetit, cilësisë së produktit dhe sigurisë.
Banka ProCredit Kosovë është ofrues kyç i financimit për NVM-të në Kosovë, që vë në zbatim praktika bankare të qëndrueshme dhe të orientuara drejt impaktit. Kjo bankë është në pronësi të ProCredit Holding AG & Co KGaA, kompania mëmë e Grupit ProCredit, që është i orientuar drejt zhvillimit dhe përbëhet nga banka komerciale për NVM-të që në fokus të veprimtarisë kanë Evropën Juglindore dhe Lindore.
Që nga fillimi i veprimtarisë në Kosovë në vitin 2012, BERZH-i ka investuar 585 milionë euro. Prioritetet strategjike të Bankës në Kosovë janë promovimi i ekonomisë së gjelbër, mbështetja e zhvillimit të sektorit privat konkurrues, si dhe nxitja e integrimit rajonal.